我的英超日記

2004年,同系沒有人肯去exchange。一個人去了。本來想找一些「留學點滴」,最後只有重看英超日記時不會作嘔。次年,同系有兩個好朋友去exchange

(一)

抵達倫敦嘅第二晚就係聯賽杯semi final,車路士主場對曼聯。

雖然冇飛,但係話晒都係一場大戰,梗係要去湊吓熱鬧。未去過史丹福橋仲有啲擔心會搵唔到個球場,結果擔心都係多餘嘅 – 當日黃昏開始已經陸陸續續見到好多藍衫藍帽藍頸巾嘅藍血人搭同一個方向嘅地鐵,總之跟住佢地行就包冇錯 – 連張地鐵圖都可以收埋。

去到球場隔離嘅Fulham Broadway都未出閘,已經聽到廣播話啲波飛已經賣晒,持所有由「其他途徑」得來嘅飛嘅人仕,係會被拒入場。果然有幾個兇神惡煞嘅男人賣緊黃牛飛。好,又過去八吓幾錢先。

「300鎊。」

吓?! 轉身即閃,個男人截住我叫我還價,我唯有同佢講我身上根本冇錢。之後我隱約聽到佢喺背後話:「300鎊有得睇車路士對曼聯,算係咁啦!」

波就冇得睇,不過見到成千上萬嘅主隊球迷一路唱歌一路食熱狗一路湧入球場,真係好好feel。

入Stamford Bridge睇一次車路士,已經成為今次exchange嘅第一志願……

(二)

一個星期四嘅早上,Stamford Bridge嘅附近出現咗好多著車路士球衣嘅…… 小朋友。摩連奴掌管車路士之後一直禁止球迷睇球隊操練,但就答應過會安排training session俾球迷入場睇。結果今季第一個亦係唯一一個training open day就喺二月一個凍冰冰嘅早上舉行。

成個training都冇嘢好睇,臨完時班球員亦好例牌地將幾箱足球踢俾fan屎。但我就打死都唔信成日話自己有一套好巴閉嘅methodology嘅摩連奴會「係咁二」叫班球員跑兩步、練幾球撞射就算。不過唔使錢有球星睇,隔離megastore仲有poster派,仲想點喎。

官方數字話有成四千人去咗睇,我淨係奇怪一樣嘢: 點解好地地一個weekday嘅早上可以有咁多爸爸媽媽帶埋啲仔女去睇練波? 佢地唔使做嘅咩?!

後來發現好多男人會每個星期拖住仔女去風雨不改去睇波,唔怪得英國球迷咁長情死硬,對住啲乙組魚腩波都可以捧足一世 – 球隊唔係重點,重點係你由細至大每個星期都會拖住老竇隻手去球場呼天搶地,係情意結,親情同童年回憶。英國球迷咩階層都有,我唔知佢地搵幾多錢,但我硬係覺得就算佢地窮到火農都會堅持每個星期好神心咁帶埋個仔去睇波。唔怪得有人同我講,英國,係capital of football。

(三)

三月十五日,車路士主場對西布朗。我懷疑是客隊太魚腩的關係,啲飛竟然賣唔晒! 開波前幾日球隊喺官網話有飛剩,general public可以去票房買。嘩,車路士喎! 英超喎! 可能人生人得一次機會…… (說服自己買飛入場嘅藉口。)

臨入場又學人買本「場刊」留念。真係估唔到睇波都要買場刊。奇怪嘅係,成五十幾蚊港紙一本嘅場刊,啲人唔係一本本咁買,係一疊疊咁買。買咁多,墊煲底咩!

不過而家明點解要現場睇波喇,體驗到咩叫主場氣勢。西布朗班球員出場嗰時逐個俾人噓,主場球迷又不斷唱歌玩人浪,其實都聽唔真佢地唱乜,淨係聽到摩連奴嗰首係用Santa Marie個melody係咁唱 ‘Jose Mourinho’。成件事都好搞笑,似開party多過睇波。以前奇怪點解有球員會咁蠢同球迷打交,而家明喇。啲球迷下下都指住球員嚟嗌,乜粗口都有,球場其實唔係好大(特別係Stamford Bridge得四萬幾個位,細到有啲令人失望),球員其實聽得好清楚,唔慶就假。

完場擔心等十世車都返唔到屋企,幾萬人同一時間搵車搭喎。點知警察疏導人潮都好快, underground每逢matchday都有特別安排,十分鐘就上到車,果然足球大過天。

唯一令人唔開心嘅係開波前出嚟娛賓嘅吉祥物 – 對住啲小朋友就有求必應,對住啲大朋友,例如我,就扮睇唔到…… 今時今日咁嘅服務態度唔得架!

(四)

兩三年前睇收費電視,見到當年嘅「雙料冠軍」阿仙奴成班球員喺架雙層巴士開party倫敦巡遊,好威。所以出發去倫敦前都有諗過:「唔知我走之前會唔會睇到車路士遊街慶祝呢?」竟然係…… 會! 仲要係近距離嗰隻!

相信係為咗唔好俾阿仙奴同利物浦搶盡鋒頭,trophy parade選擇了在FA Cup及歐聯決賽中間舉行。12點鐘開始,據聞朝早已經開始有人群聚集,個個都拎住支藍色旗,仲有人油到自己成身藍色,完全party mood。唔使等好耐,風頭躉John Terry同 Frank Lampard就坐咗喺車頭,捧住個超聯獎杯又跳又唱,好鬼high。

不過成件事最令我surprise嘅係……俄羅斯油王竟然都在場! 佢都坐到好前,keep住微笑。我好疑惑: 睇圴成架巴士都唔覺有任何保鏢/彪形大漢,油王身驕肉貴,唔通佢咁信得過倫敦嘅治安? 我又諗咗好耐,艾巴莫域會唔會係我有生以來見過最有錢嘅人?!

唱歌似乎係英國球迷嘅指定動作,今日最多人唱,最啱聽嘅歌係…… “ARE YOU WATCHING ARSENAL ?” ! 啱嘅,有風駛盡利,點知下季會唔會豆都贏唔到粒…… 第日報紙話有成廿萬人嚟咗睇,當你double counting都仲有十萬,勁!

至於摩連奴…… 真係唔好近距離望佢咁耐,小心俾佢啲單眼同微笑電死……

(五)

曼聯皇馬巴塞攜手東征掘金,這兩個星期突然好多免費波睇,但唯一吸引到我週末晚上趕翻屋企的伍晃榮加林尚義,原來是個世紀大騙局,兩個人加埋都唔知有冇講咗十五分鐘波。

不過,我還是入了場睇曼聯,看看我的終極偶像…… 雲達沙。唔明點解費爵爺要用7年,等到雲達沙35歲先簽到佢,不過有機會喺山頂位望住佢著住件19號球衣(?!)喺自己龍門口企咗45分鐘,總算了結一件心事(?!)。曼聯,點都好過富咸掛。

講搵錢,如果單計球場的megastore,我都認為紅魔鬼最識做生意。到過奧脫福,行過它的megastore,大部份紀念品都由Nike生產,地方寬敞、貸物排放整齊,服務員收銀處樣樣井井有條,很有大企業的感覺。連不是球迷的朋友也破了財!

相反,到過阿仙奴的shop (不是megastore),終於明白雲加點解成日苦口苦面呻窮。如果曼聯megastore是一間百佳,隱藏在住宅區中的兵工廠大概是7-11。雖然車路士的store也不是特別大,還要分開了兩間,不過睇個勢遲早都會擴建。梗係啦,下個球季啲飛又加咗價喇。

到柏林和巴塞隆納玩的時候也有到球場行個圈,哈化柏林的奧林匹克體育場當然要到,06世界杯決賽就喺度踢喇! 球場靚到好似羅馬鬥獸場咁宏偉,點知一入個shop,賣嘅唔係哈化柏林嘅紀念品,而係…… 都係由Nike贊助嘅巴西同葡萄牙嘅波衫。Nou Camp情況好啲,兩層megastore有一層其實係Nike特賣場,不過一路望住櫥窗張海報,一路諗…… 當今世上有邊隊球隊係一個靚仔球員都冇都可以咁受歡迎嘅呢……

我想搵翻雲達沙喺阿積士時會夠膽扭人地個前鋒嗰種自信……

Advertisements

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s